كتبها عاطف خيري وهو لأول مرة يسافر
بالقطر من الشمالية إلى الخرطوم
عندما قبل في الجامعة
كتب هذه القصيدة لأمه
قام يا يمه قطار أغداري
وكان متوجه نحو البندر
وأي محطة يفوتا يسافر
عمري معاهو وحاتك يقصر
إتذكرتك أنا في السكة
إتذكرتك أنا كم مرة
لا لا وحاتك مابتذكر
***
الخرطوم ملعون هي أبوها
وماها بلد والله يجوها
الخرطوم اللعبة الطالت ومافي حكم صفر ينهيها
الخرطوم اللعنة الحلت فوق جوف الناس السكنت فيها
أول من جيت سألوني جماعة حدد حدد حدد حزبك
وصيتك جات طوالي في راسي
وقلتي لي أختا الأحزاب وأوعك ترجع لي سياسي
أنا عارفاك من قمت صغير عاشق جوطه وديمه حماسي
رديت بي سرعة ما متحزب ما متحزب ما متحزب
كوركو في وأبو يختنعو وقالولي كمان بتكذب
فيهم صحت أنا زول بأحب الله
ونمره اتنين وطني السوداني
عيون الحلوة الواقفات برة
بكره بجيهن وأسكن فيهن أصلي بريدن وكلي حناني
فيهم صحت
يا وطن يا جرح دامي
للأسف شعبك هلامي
شعب خانق إنهزامي
لما فقدو الحيلة جنبك
قالو عنك قطر نامي
إنت يا وطني اللضايع
لا متين منك بنسأل
انت ما مرتع تجارب للبيعرف والبيجهل
انت أكبر في الحقيقة
إنت ما محتاج لسيد والله درويش من طريقة
***
أسأل مره السايق بنزي
ويحرق ساكت في البنزين
طالع فسحه معاهو مدامو
وجنبو عيالو الشبعانين
هل جربت نزلت الشارع
شفت العالم كيف عايشين؟
شفت الشفع في الطرقات
والبي يغسلو في العربات
تلقى الواحد لابس هدمو
نصو مشرط ونص رقعات
شافع أورنيش
شافع يا دوب ما ربى الريش
شايل باغتو ورابط الفيش
كش كش كش أورنيش أورنيش
ناس بتمسح قعر الجزمة
وناس تتمردغ فوق النعمة
وناس سنتين ما ضاقو اللحمة
أسأل ديل كيف عايشين
ديل الفطو فطور الجمعة
عشان ما ياكلو غدا الإتنين
يعني الواحد في بطن أمو
مكتوب ليهو يعيش مسكين
يعني الحظ الشال وأداك
مابيديهو ولو بالدين
يا إنسان لما بنيت عليت بنيان
لما أكلت حقوق الناس واتعاليت بقيت طغيان
فكر فكر دبر أمرك
فكر يوم في ظلمة قبرك
كيف تنوم مرتاح في قصرك
وراقد تحتك زول جاعان
***
يمه أظن كترت عليكي
وكنت بأوصف أكتر وأكتر
الخرطوم الماضي المظلم
الخرطوم مستقبلا أغبر
شايفك تسألي عن سكانا
لا لا وحاتك مابتتشكر
الخرطوم واحد من ديل
ياما بيسرق وياما بينهب وياما بيسكر
وأي رئيس تنتخبو الأمة
ماخد برضو طباع من جعفر
وأي رئيس تنتخبو الأمة
ماخد برضو طباع من جعفر
الرئيسية 
اليومية
