صليت
الصبح بدري ورفعت الهين
قت يا مهون ام خداد اشوفها متين
مشتولة القرير الترقنها اللقنين
بدنيها اب شنق قارح تيوس سرجين
جبدت سيفي ومرق عفشي ونويت بالقومة
وكرب سرجي فوق ضهر الكزازي ابو دومة
قت يالصالحين البكشفو المكتومة
اشوف خد ام سماحتا في البنات معدومة
قت يا من بقيم الليل ويصلي نوافل
باصرتو وقمز فوقو وطفر بي جافل
هضليما سمع كوراك بعد مو غافل
نيتو يماسي عرض الدنقلاوي الحافل
عقب السينجة والحوش البرم سعلوقو
واتعنقل طريفيا نطر عشنوقو
علي بلد القبل قاتل محلق شوقو
سوى تدفق المزر النفنو بروقو
تيس قنة الصي الرزملو بطيني
ترة جرايدو واتقيقم لفخ ناوليني
على بلد السحي الكتر عليهو حنيني
لحض الكلب وخلا الشوف يجر باريني
عراض الدلاليك اللقالو هيوت
ردع الدرب وخلى الواسعة تجري خيوت
على ديفة غنم بية الرمت في ختوت
خلى السرج يعيط نبعن قماقمو حروت
اب خاوية الجناحو بكفت القمرية
شتت خبو واتكرف هوى الباكرية
الزاعباهو بتموح في الجزاير نية
مهرة خيل وفيك ان وقلت وحشية
بعد وخر تميد الفنجري المشكور
جاب جنو ومرق دلعو القبيل مدخور
هفتلو الصبر ديفة العلو الممطور
وقنب يحاكي هجلوبا لقى الطمبور
يا اب قنفة المجازي الفي الرهابة زوالو
وين بلد الحرق دمي ورماني غزالو
مشتول الروى الساقيه الدغش تربالو
قاسم نصو لا عند المتاني حلالو
تيس دبب ام زرازير الرزم تعالو
ود الفادني غز فيهو ولفخ تكالو
على بلد المعذب روحنا والنوم شالو
ترة جرايدو والصي المفاسح كالو
عقبو هوادو تيس العلا اب سيقان
سدرو يعوم وسرجو سفينة الطوفان
على الكنانة درعاة الجزو ام طيقان
بالصي رف واتمرعف دنا السيحان
حفير اب لحظة جاها مدودو العكروت
خايفا قلبو طاير من لسان السوط
على مشتولة الهرف ام شرابا يوت
حرت الكف وقنب بالهويدة يجوط
هكع فوق ودي كبشوالعزاز اماتو
جابلو تدعدعة وقودة ونفض عسراتو
على ام ضوقا مسخ عندي العسل بحلاتو
مصع العردس البطانبن دوماتو
جابلو فجيج بعد ما وخر التاهيت
وردع الفنقة تيس ريلا سمعلو عويط
على الخدادها انضف من دهب فرتيت
ضراعو برف وسرجو بغاني في اب داييت
بقير ود الفقر جاهو اب شنق مزعوب
لحض السوط وسوى تتحتح االمرقوب
بعد ما طارلو بالصي نيب وجنو حدوب
لعب صقرية اب هجبة اللقى الواندوب
داك عقاد سهل جاهو الكزازي برف
يتضرع تقول عوام وصدرو بزف
شيوم العانس المنخرتة ماها ام زف
رق ضميرو ود صهباة عمارة ام تف
الرئيسية 
اليومية
